રાષ્ટ્રપતિ એવોર્ડ વિજેતા પર્યાવરણવાદી વિરલ દેસાઈનું નવસારીની ખ્યાતનામ શાળા એબી સ્કૂલમાં વક્તવ્ય યોજાયું હતું, જેમાં તેમણે શાળાના ચારસો જેટલા વિદ્યાર્થીઓ સામે પર્યાવરણ સંરક્ષણ સંદર્ભની રસપ્રદ વાતો કરી હતી. સાથે જ શાળાના કેમ્પસમાં નેટીવ સ્પિસિસના વૃક્ષોનું વાવેતર પણ કરવામાં આવ્યું હતું.
આ પ્રસંગે ગ્રીનમેન વિરલ દેસાઈએ વિદ્યાર્થીઓ સમક્ષ પર્યાવરણ સંરક્ષણ અને પ્રદૂષણ સંદર્ભના કેટલાક ફેક્ટ્સ રજૂ કર્યા હતા. તો આજના સમયમાં વધુમાં વધુ ‘પર્યાવરણ સેનાની’ઓ શું કામ તૈયાર થવા જોઈએ એ વિશે વિદ્યાર્થીઓને પ્રોત્સાહન આપ્યું હતું. જોકે પોતાના વક્તવ્યમાં વિરલ દેસાઈએ વિદ્યાર્થીઓ સમક્ષ કેટલીક પ્રેરણાત્મક વાતો પણ શેર કરી હતી.
આ સંદર્ભે તેમણે જણાવ્યું હતું કે, ‘આજે વિદ્યાર્થીઓ માટે પર્યાવરણ એ માત્ર તેમના અભ્યાસનો જ ભાગ છે, પણ પરંતુ તેમને ખ્યાલ નથી કે પર્યાવરણ એ તેમના જીવનનો અભિન્ન હિસ્સો છે અને આ પર્યાવરણના જતનની જવાબદારી આવતીકાલે તેમના પર જ આવવાની છે. આ માટે થઈને જ હું તેમને પર્યાવરણ સંરક્ષણના કેટલાક સાચા આંકડા લઈને પહોંચું છું અને તેમને પર્યાવરણ સેનાની બનાવું છું.’
આ કાર્યક્રમ દરમિયાન વિદ્યાર્થીઓએ અત્યંત બહોળો પ્રતિસાદ આપ્યો હતો. તેમણે પર્યાવરણ સંરક્ષણ સંદર્ભે અનેક પ્રશ્નો પૂછીને પોતાની ઉત્સુકતા વ્યક્ત કરી હતી.
