સુરતમાં ICA GemLabની જેમોલોજિકલ લેબ શરૂ, હીરા-રત્નોની તપાસ માટે મળશે આંતરરાષ્ટ્રીય સ્તરની સુવિધા

હીરા, રંગીન રત્નો અને જ્વેલરીના ટેસ્ટિંગ રિપોર્ટ મળશે; ઉદ્ઘાટન સમારોહમાં હીરા-જ્વેલરી ઉદ્યોગની હસ્તીઓ ઉપસ્થિત રહી

સુરત. વિશ્વના અગ્રણી હીરા અને જ્વેલરી વેપાર કેન્દ્રોમાં સ્થાન ધરાવતા સુરતમાં આંતરરાષ્ટ્રીય સ્તરની જેમોલોજિકલ લેબોરેટરી શરૂ થઈ છે. ICA GemLab Indiaની આ લેબોરેટરીનું મંગળવારે લાલ દરવાજા સ્થિત એક્સલેન્ટ બિઝનેસ હબમાં ઉદ્ઘાટન કરવામાં આવ્યું. આ સુવિધાથી હીરા ઉત્પાદકો, હોલસેલર્સ, વેપારીઓ, રિટેલર્સ, જ્વેલરી બ્રાન્ડ્સ, ડિઝાઇનર્સ અને ગ્રાહકોને હીરા, રંગીન રત્નો તથા જ્વેલરીની તપાસ અને તેના રિપોર્ટ મેળવવામાં સુવિધા મળશે.

ઉદ્ઘાટન સમારોહમાં કલામંદિર જ્વેલર્સના સહ-સ્થાપક મિલન શાહ મુખ્ય અતિથિ તરીકે ઉપસ્થિત રહ્યા હતા. ICA GemLab Globalનાં મેનેજિંગ ડિરેક્ટર અમીરા ડબલ્યુ. હટ્ટા અને મુખ્ય સંશોધન વૈજ્ઞાનિક ડૉ. ડીટમાર શ્વાર્ઝ વિશેષ અતિથિ તરીકે હાજર રહ્યા હતા. કાર્યક્રમમાં હીરા અને જ્વેલરી ઉદ્યોગ સાથે સંકળાયેલા પ્રતિનિધિઓએ પણ ભાગ લીધો હતો.

ભારતીય બજારને મળશે આંતરરાષ્ટ્રીય તપાસ સુવિધા

સુરતમાં ICA GemLabની શરૂઆત ભારત સહિત સમગ્ર ભારતીય ઉપખંડમાં સંસ્થાની હાજરીના વિસ્તરણની દિશામાં મહત્ત્વપૂર્ણ પગલું છે. આ ભારતીય ઉપખંડમાં સંસ્થાની પ્રથમ સુવિધા છે. સંસ્થાનું મુખ્ય મથક બેંગકોકમાં છે, જ્યારે દુબઈ અને હોંગકોંગમાં પણ તેની કચેરીઓ કાર્યરત છે. સુરતમાં લેબ શરૂ થવાથી સ્થાનિક વેપારીઓને તપાસ માટે અન્ય શહેરો કે દેશો પર નિર્ભર રહેવાની જરૂરિયાત ઘટશે.

ICA GemLab Indiaના ડિરેક્ટર કલ્પેશ દેસાઈએ જણાવ્યું હતું કે ભારત વિશ્વના હીરા અને રત્નોના ઉત્પાદન ક્ષેત્રમાં મહત્ત્વનું સ્થાન ધરાવે છે અને સુરત આ ઉદ્યોગનું મુખ્ય કેન્દ્ર છે. સંસ્થાનો હેતુ ઉત્પાદકો અને વેપારીઓથી લઈને રિટેલર્સ, ડિઝાઇનર્સ તથા ગ્રાહકો સુધી આંતરરાષ્ટ્રીય સ્તરની વિશ્લેષણ પદ્ધતિઓ અને રિપોર્ટિંગના ધોરણો પહોંચાડવાનો છે. વિશ્વસનીય જેમોલોજિકલ માહિતી અને દસ્તાવેજીકૃત તપાસ પ્રક્રિયા દ્વારા વેપારીઓ તથા ગ્રાહકોને યોગ્ય નિર્ણય લેવામાં મદદ કરવાનો પણ સંસ્થાનો ઉદ્દેશ છે.

ICA GemLab Globalનાં મેનેજિંગ ડિરેક્ટર અમીરા હટ્ટાએ જણાવ્યું હતું કે ભારત વૈશ્વિક રત્ન અને આભૂષણ ઉદ્યોગનાં સૌથી મહત્ત્વનાં બજારોમાંનું એક છે. સુરતમાં લેબ શરૂ થવાથી સંસ્થાની તપાસ અને વિશ્લેષણની સુવિધાઓ સીધી સ્થાનિક બજાર સુધી પહોંચશે.

ત્રણ પ્રકારના રિપોર્ટ જારી થશે

સુરતની લેબોરેટરીમાં ડાયમંડ રિપોર્ટ, રંગીન રત્નોનો રિપોર્ટ અને જ્વેલરી રિપોર્ટ એમ ત્રણ પ્રકારના રિપોર્ટ જારી કરવામાં આવશે. તેમાં હીરો કુદરતી છે કે સિન્થેટિક, તેની ઓળખ ઉપરાંત રત્નો અને આભૂષણોની તપાસ સંબંધિત વિગતવાર માહિતી પણ આપવામાં આવશે.

ICA GemLab એક સ્વતંત્ર જેમોલોજિકલ લેબોરેટરી છે. તે રંગીન રત્નોના ઉદ્યોગ સાથે સંકળાયેલી આંતરરાષ્ટ્રીય સંસ્થા ઇન્ટરનેશનલ કલર્ડ જેમસ્ટોન એસોસિયેશન સાથે સંલગ્ન છે. સંસ્થાના જણાવ્યા અનુસાર, સુરતની લેબોરેટરીમાં પણ સમગ્ર જૂથમાં અમલમાં રહેલા સમાન રિપોર્ટિંગ ધોરણો અને વ્યાવસાયિક તપાસ પદ્ધતિઓનું પાલન કરવામાં આવશે.