સુરત: જન્માષ્ટમીના પાવન પર્વને સર્જનાત્મકતા, ભારતીય સંસ્કૃતિ અને ફેશન ડિઝાઇન સાથે જોડીને IDTના ફેશન ડિઝાઇનિંગના વિદ્યાર્થીઓ દ્વારા એક અનોખું ‘જન્માષ્ટમી રનવે’ તૈયાર કરવામાં આવ્યું છે. આ રનવેમાં ભગવાન શ્રીકૃષ્ણના જીવન સાથે જોડાયેલી વિવિધ લીલાઓને ફેશનના માધ્યમથી રજૂ કરવામાં આવી છે.
વિદ્યાર્થીઓએ શ્રીકૃષ્ણના જીવન અને બાળપણની વિવિધ પ્રસંગોને આધાર બનાવીને અલગ-અલગ થીમ પર ગારમેન્ટ્સ ડિઝાઇન કર્યા છે. જેમાં શ્રીકૃષ્ણ જન્મ, મહાભારત, યમુના લીલા, કાળીયા નાગ લીલા, માખણચોર, હોળી ઉત્સવ, ગોવર્ધન લીલા અને ગવાલા જેવી વિવિધ થીમ્સનો સમાવેશ કરવામાં આવ્યો છે.
દરેક થીમને અનુરૂપ વિદ્યાર્થીઓએ માત્ર ગારમેન્ટ જ નહીં, પરંતુ તેની સાથે જોડાયેલા ઓર્નામેન્ટ્સ, હેડગિયર, એક્સેસરીઝ અને અન્ય ડિઝાઇન એલિમેન્ટ્સ પણ જાતે જ ડિઝાઇન કર્યા છે. આ સમગ્ર પ્રોજેક્ટમાં વિદ્યાર્થીઓએ પરંપરાગત ભારતીય કળા અને આધુનિક ફેશન ડિઝાઇનનું સુંદર સંયોજન રજૂ કર્યું છે.
આ પ્રોજેક્ટની ખાસિયત એ છે કે શ્રીકૃષ્ણના વિવિધ સ્વરૂપો માટે તૈયાર કરવામાં આવેલા લાડુ ગોપાલના પોશાકો વિદ્યાર્થીઓ દ્વારા સંપૂર્ણપણે હેન્ડક્રાફ્ટેડ બનાવવામાં આવ્યા છે. પોશાકોમાં હેન્ડવર્ક, એપ્લિકે વર્ક, એમ્બ્રોઇડરી તથા વિવિધ પ્રકારની સપાટી સુશોભન તકનીકો*નો ઉપયોગ કરવામાં આવ્યો છે. દરેક પોશાક પાછળ વિદ્યાર્થીઓએ તેમની કલ્પનાશક્તિ, સંશોધન અને ટેકનિકલ કુશળતાનો ઉપયોગ કર્યો છે.
આ સમગ્ર પ્રક્રિયા દરમિયાન વિદ્યાર્થીઓએ થીમ ડેવલપમેન્ટથી લઈને ગારમેન્ટ ડિઝાઇન, કલર કોમ્બિનેશન, ઓર્નામેન્ટેશન, એક્સેસરી ડિઝાઇન અને હેન્ડવર્ક સુધીનું સમગ્ર કાર્ય ટીમવર્ક સાથે પૂર્ણ કર્યું છે.
‘જન્માષ્ટમી રનવે’નો મુખ્ય ઉદ્દેશ માત્ર ફેશન પ્રસ્તુતિ કરવાનો નથી, પરંતુ ભારતીય સંસ્કૃતિ, પૌરાણિક વાર્તાઓ અને પરંપરાગત કળાને નવી પેઢીની સર્જનાત્મક દૃષ્ટિ સાથે જોડવાનો છે. વિદ્યાર્થીઓએ શ્રીકૃષ્ણની લીલાઓને માત્ર એક વાર્તા તરીકે નહીં, પરંતુ એક વિઝ્યુઅલ ફેશન સ્ટોરી તરીકે રજૂ કરી છે.
આ પ્રોજેક્ટ દ્વારા IDTના વિદ્યાર્થીઓએ સાબિત કર્યું છે કે ફેશન માત્ર વસ્ત્રો સુધી મર્યાદિત નથી, પરંતુ તે સંસ્કૃતિ, વારસો, કલા, વાર્તા અને સર્જનાત્મકતાને વ્યક્ત કરવાનું એક શક્તિશાળી માધ્યમ પણ છે.
‘જન્માષ્ટમી રનવે’ દ્વારા IDTના વિદ્યાર્થીઓએ ભારતીય પરંપરાને આધુનિક ફેશનની ભાષામાં રજૂ કરીને સંસ્કૃતિ અને સર્જનાત્મકતાનો અનોખો સંગમ સર્જ્યો છે.
