ગ્રીનમેન વિરલ દેસાઈએ દમણ ઈન્ડસ્ટ્રીયલ એક્સપોમાં ‘વેસ્ટ ટુ વેલ્થ’ અને ઓવર-કન્ઝ્યુમરિઝમ પર પ્રભાવશાળી વક્તવ્ય આપ્યું

સુરત: ભારત સરકાર અને વિઝનરી લીડર શ્રી પ્રફુલ પટેલના માર્ગદર્શન હેઠળ દમણમાં આયોજિત પ્રતિષ્ઠિત ‘ઈન્ડસ્ટ્રીયલ એક્સપો’ અને ‘બુક ફેર’માં જાણીતા પર્યાવરણવિદ અને ‘ગ્રીનમેન’ તરીકે ઓળખાતા વિરલ દેસાઈએ નિષ્ણાત તરીકે વિશેષ હાજરી આપી હતી. દમણના ઈન્ડસ્ટ્રી સેક્રેટરી આઈ.એ.એસ. શ્રી ઓમકાર મરાઠેના આમંત્રણને માન આપીને વિરલ દેસાઈએ આ કાર્યક્રમમાં ઉપસ્થિત રહી યુવાનો અને ઉદ્યોગ જગત સાથે સંવાદ સાધ્યો હતો.

આ કાર્યક્રમ દરમિયાન વિરલ દેસાઈએ ‘વેસ્ટ ટુ વેલ્થ’ (કચરામાંથી કંચન) અને ‘ઓવર કન્ઝ્યુમરિઝમ’ (અતિશય ઉપભોક્તાવાદ) જેવા મહત્વના વિષયો પર ઊંડાણપૂર્વક ચર્ચા કરી હતી. તેમણે સમજાવ્યું હતું કે કેવી રીતે વર્તમાન સમયમાં વધતો જતો વપરાશ પર્યાવરણ માટે જોખમી છે અને કઈ રીતે વેસ્ટ મેનેજમેન્ટ દ્વારા સંપત્તિનું સર્જન કરી શકાય છે.

આ સત્રમાં મોટી સંખ્યામાં વિદ્યાર્થીઓ, યુવાનો, અગ્રણી ઉદ્યોગપતિઓ અને પોલિસી મેકર્સ ઉપસ્થિત રહ્યા હતા. વિરલ દેસાઈના વિચારોથી પ્રભાવિત થઈને ઉપસ્થિત લોકોએ અનેક રસપ્રદ પ્રશ્નો પૂછ્યા હતા, જેના તેમણે ખૂબ જ સચોટ ઉત્તરો આપ્યા હતા. કાર્યક્રમના અંતે વિરલ દેસાઈએ દાદરા નગર હવેલી અને દમણ-દીવ પ્રશાસનનો આભાર માનતા જણાવ્યું હતું કે, ‘આ પ્રકારના આયોજનો પર્યાવરણીય જાગૃતિ અને ઔદ્યોગિક વિકાસ વચ્ચે સેતુ બાંધવાનું કામ કરે છે.’